現實之中，會唔會有人明明想買匹千里馬，但就花咗一筆不菲嘅價錢去買一堆馬骨？如果遇到呢種情況就要特別留意喇，因為呢個人好有可能喺度放長線釣大魚。

據《戰國策·燕策》記載，以前有個君王想求一匹千里馬，仲出到千金咁高嘅價錢求馬。點知過咗三年，居然都買唔到千里馬。於是就有下屬自動請纓去買馬，本身呢個下屬用咗三個月時間終於見到匹千里馬，點知隻千里馬太短命，居然死咗。然後個下屬竟然連馬骨都唔放過，用半價買嚟獻俾君王。君王見到梗係嬲嬲豬喇，搞錯呀，我要生嘅千里馬呀，你用五百金買堆骨返嚟俾我？下屬就淡定解釋話，大王唔好嬲住，仲解釋返死馬嘅骨都出到五百金嚟買，更何況係活生生嘅千里馬？呢個消息一傳出去，天下必定認為大王係真心買馬，好快就會有千里馬嚟㗎喇。果然，一年唔夠，就有三匹千里馬獻上門。

呢個故事點嚟？話說喺戰國時期，燕昭王想廣招天下能人異士振興燕國，於是就請教大臣郭隗要點做。郭隗就同燕昭王講咗買馬骨嘅故事，建議燕昭王效仿故事入面嘅做法，當郭隗係馬骨咁對待，啲人見到好似佢咁嘅人都能夠得到重用，自然就會吸引其他有能力嘅人前嚟效力。燕昭王覺得好有道理，於是賜郭隗高薪厚職，仲為佢修築宮殿兼奉佢為師，果然就引嚟其他各國嘅人才爭相嚟燕國效力。阿史成日都覺得呢個故事只係郭隗想求賞賜同重用先臨時作出嚟嘅藉口，不過宜家睇返，郭隈亦不失為一個智者，呢條千金買馬橋喺好多事上面真係幾work。

原圖嚟自網絡。